HADEES KI TAREEF OR US KI AEHMIYAT
Paigamber-e-islam Hazrat Muhammed Mustafa ﷺ ke qaul(baat) wa fe’al(kaam) or taqreer ko Hadees kehte hai. Yani aap jo kuch farmate ya karte yadusre log aap ki maujoodgi mein kuch karte ya kehte or is par aap khamosh rahe in sab baton ko hadees kehte hain.
Sahaba ye Kiram or Hazrate Tabi’een ke aqwaal wa afwaal taqreerat ko bhi ulma ne hadees farmaya hai.
Chunki Allah ta’ala ko kisi ne na dekha na hi Allah ta’ala ne barahe rast kisi se kuch farmaya bas Huzoor Nabi kareemﷺ jo Allah ke sachhe Rasool hai unhone jo kuch farma diya usi ko Allah ta’ala ki baat maan liya gaya.
Goya ki Allah ta’ala ke mu’amiley me aap ki zaat par pura bharosa or aetbaar or aap ki zubaney pak or kirdaar wa tareeqye kaar ka naam hi islam wa iman hai or aap ki har baat khuda ki baat hai, lihaza Hadees bhi Qur’an ki tarah bil wasta kalamey ilahi hai.
Khud khuda-e-ta’ala Qur’an-e-kareem me in irshad fermata hai
(tarzuma) “Jis ne rasool ki baat mani, usne Allah ki baat mani”.
Kisi ke dil mein kisi ki aehmiyat wa waq’ar wa azmat jitni jyada hoti hai utni who uski baat ko aehmiyat deta hai or jis ko jis se jitni jyada muhabbat wa ulfat hoti hai who itni hi uski farma-bardari or uske huqm ki bzaaa-vri karta hai. Goya ki Huzoor ki itta’ba wa pairawi or aap ke bataye huwe raste par chalne ke liye aap se muhabbat wa ishq jaroori hai.
Or jisko Huzoorﷺ se sach ha ishq or asli muhabbat hogi who aap ki nafarmani kabhi nahin karega or wahi karega jis se aap razi hain
Jo log zaheeri namaz rozey or aehkamey shar’a ke to qaayal hain lekin Huzoorﷺ se ishq wa muhabbat ki daulat se inke dil khali hain who hargiz raahey raast par nahi hain or in ki namaz rozey be-raunak roohaniyat se khali be-dum riya-kari or dikhawa ban kar rehgaye hain.
Or woh log jo muhabbat wa ishq ke dawe daar hain, namaz roza wageraha ehkamey shar’a ke paband nahi, haraam wa halaal ki tameez nahi karte, gaane bajaney, tamashon, filmon me raat-din guzaartey hain, maa-baap ko satatey, logo par zulm karte hain, inke ishq wa muhabbat wa aqeedat ke dawey sab na-qabila etbaar hain.
Jo sahi mana’a me aashiqey Rasoolﷺ hoga who aapki pairawi wa farman bardari jaroor karega or pairawai wa farman bardari me lutf usi ko hasil hoga jo huzoor ka aashiq wa diwana hoga.
Ummatey muslimaan me Huzoorﷺ ke irshaadat ko jam’a karne or hadees ki kitaabein likhney ka shauk ahle ilm ko har daur me raha hai. Or beshumaar kitaabein is Mubarak fann par likhi gayi hain. In mein sabse jyada mash-hoor wa mu’attabar kitaabein jo aaj kal b’a asani kutub-khano me dastyaab hain or har zamaney me ahle ilm ne unko izzat wa aehmiyat di or in par aetbaar kiya hai unke naam yeh hain:
“Sahih bukhari, Sahih muslim, Jami’a tirmizi, Sunn e abu da’ood, Sunne nisayi, Sunne ibne maza, Mishkat ulmasabeeh. Mu’atta Imam Malik.
Aaj kal islami deeni aalim banaye jane wale madarson ke course me bhi yeh kitaabe dakhil hain or sabhi maktaba’a e fikr ke log inhe padhte or padhate hain. “Hadeeso Ki Roshni”naam ki yeh kitaab jo is waqt aap ke samne hai maine koshish ki hai ki isme saari hadeese inhi kitaabo se jama’a ki jaye kyunki yeh kitaabein aasani se mil jati hain or mere likhe hawaale ki madad se har kam padha-likha bhi asal kitaab me in hadees talaash kar sakta hai. Halanki hadees ki mu’attabar mash-hoor kitaabein or bhi hain maslan Musnad Imam Aazam Abu Haneefa, Musnade Imam Ahmed Ibne Hambal, Musannaf Abdur-Razzak, Musannaf Ibne Abee Shaiba, SunneDaarmi, Sunne Dar Kutni, SunneBehki, Tasanifey Tabrani wagerah. Lekin yeh aaj kal khususan Hindustan me in umuman dastyaab nahin. Lihaza inki ahadees or hawaale maine nahin likhe hain. Agarche is kitaab me in ahadees ko jama’a karna hi mera maksad Qur’aani ya bhi zikr kar di gayi hai.
(TATHEER AHMED, Barelwi)
