TAMHEEDI KALIMAAT
Pyare islami bhaiyo! Jis zaat ne har cheez ko paida kiya hai uska naam “ALLAH” hai. Wahi or sirf wahi hai sab ka khaliq, malik or rozi dene wala hai.Uska koi sharik or saajhi nahin.Wah bejod hai. Sab ko uski zarurat hai. Usko kisi ki zarurat nahin. Sab ko deta hai kisi se leta nahin, sab ke liye maut or fana hai wo isse paak hai, hamesha se hai or hamesha rahega. Uski haqiqat ko koi jaan nahin sakta. Sirf wahi ibadat or prastish ke layaq hai jo uske alawah kisi or ki ibadat or pooja kare wo musalman nahin hai. Uski makhlooq mein insan bhi hain balki insan uski ajib wa garib makhlooq hai. Insanon ki rehnumai or hidayat ke liye usne kuch apne makhsoos bande har zamane mein paida farmaye jin ko Nabi wa Rasool kehte hain. Nabi or Rasoolon ki ginti ek lakh se bhi jyada hai.inme sab se aakhiri nabi jinka laya hua deen Islam Qyamat tak chalega. Un ka naame naami Hazrat “MUHAMMED” hai. ﷺ
Nabiyon or Rasoolon ke laye hue deen par chalne or dusro ko chalane ke liye Khudaye Ta’ala unki ummaton mein kuch or bande paida farmata hai jin ko Aoliya ya Buzurgaane deen kehte hain.
Jis tarah Allah Ta’ala ne apni dusri makhlooqat mein sab koek jaisa nahin bnaya isi tarah Hazraate Ambiya or Aoliya ko bhi aam insanon ki tarah nahin bnaya hai. inko bari shaan, muqam wa martaba Allah ta’ala ne apne fazl wa karam se ata farmaya hai. mitti bhi Allah ta’ala ne banayi hai or “sona” bhi Allah ta’ala ne banaya hai. Gulam bhi Allah ta’ala ne banaye hain or aaqa bhi usi ne banaye hain. Faqeer or badshah, mangta or daata, mangne wale or dene wale, pane wale or bakhshne wale, khane wale or khilane wale, muhtaj or mukhtar sab ka banana wala or paida karne wala sirf or sirf Allah Ta’ala hai.
Pyare islami bhaiyo! Jis tarah mitti or sone mein itna farq hai ki hisab lagana mushkil hai, mangta or daata mein, gulam or aaqa mein, faqeer or badshah mein mamuli nahin bara farq hai. Isi tarah Ambiya or Aoliya or aam logon mein bhi itna farq hai ki jis ko bayaan karna dushwaar hai. Sahi baat yeh hai ki banana wala sab ko Allah ta’ala hai lekin usne Ambiya wa Aoliya ko wo shaan wa martaba ata farmaya hai ki aam log agar mitti hain to wo unke muqable mein sone se bhi kahin ashraf wa behtar hain. Hum gulam hain wah aaqa wa daata, hum faqeer hain wah badshah.
Kuch log aise khyalaat ko shirk or kufr or islam ke khilaaf samajhte hain. Halaan ki aisa aqeeda rakhna hi islam hai. Balki isi mein imaan ka maza hai. Yeh shirk or kufr jab hota jab ki yeh kaha jata hai ki Allah Ta’ala ke diye bagair unhone yeh martabe khud hasil kar liye hain. Ya unhone khuda se batwaarah kar ke paaye hain or us ke barabar ya saajhi or sharik ho gaye hain. Halaan ki yeh sab baatein wo hain ki inhe koi ganwar se ganwar Musalman soch bhai nahin sakta balki wah unhe sunna bhi gawara nahin kar sakta.
Baat sirf yeh hai ki jisko jitna diya sirf Allah hi ne diya apni marzi or pasand se diya us se koi zabardasti chheen kar ya baant kar nahin le sakta. Haan apni marzi se jisko chahta hai jitna chahta hai jo chahta hai ata fermata hai. Yaha tak ki apne fazl wa karam se us ne apne kuch makhsoos bandon ko bemisal wa bemisaal bana diya. Maalik wa sarkar bana diya. Gaibdaan or Mukhtar bana diya. Or logon ka inko aaqa, daata, or badshah bana diya. Qur’ane karim mein khud irshad farmata hai :
“Tum farmaao aye Allah! Tu hi saare mulk ka maalik jis ko chahta hai apne mulk se ata farmata hai jis se chahta hai apna mulk chheen leta hai, jis ko chahta izzat deta hai or jis ko chahta hai zillat deta hai. Saari bhalai tere qabze mein hai.Tu jo chaahe wo kar sakta hai. Raat ko din mein dakhil farmata hai or din ko raat mein. Zinde ko murde se lata hai or murde ko zinde se or jisko chahta hai us ko behisaab ata farmata hai.”(Parah 3, Ruku’ 10, Sureh Aale Imran)
Khudaye ta’ala ki milkiyyat ki to yeh shaan hai ki agar kisi ko kuch deta hai to dene ke baad bhi us ka haqeeqi maalik wahi hai balki jo cheez deta hai us ka maalik wahi hai or jis ko deta hai us ka maalik bhi wahi hai goya ki wah maalikon ka bhi maalik hai.
Islamiyaat par nazar rakhne wale jante hain ki ek musalman hone ke liye jis tarah Allah ki ibadat or uski pooja ka aqeeda rakhna zaruri hai isi tarah Allah waalon se muhabbat wa akeedat bhi zaruri hai.
Ambiya, Aoliya or buzurgaane deen ka aehtram in ki or har wo cheez jo inse nisbat rakhe us ki ta’zim wa takreem or paas wa adab imaan wa islam ki jaan hai. balki imaan ki hifazat imaan par qayam rehne or imaan par marne ke liye nihayat zaruri hai.
Namaz, roza wa zakat, farayaz wa wajebat aehkame shar’a musalman hone ke liye lazim hain. Lekin jinke zariye or wasile se Allah ta’ala ne namaz wa roza wagerah deeni umoor ata farmaye hain inko bhul jana, faramosh karna, inse aqeedat wa muhabbat na karna balki in ki bargah mein be adab ho jana in ko bara bhai ya apne jaisa insan samajhna yaqeenan islam dushmani or mazhab se doori hai.
Kabhi kabhi Ambiya-e-kiram ya buzurgaane deen ne bataure aajizee wa inkesari khud apne bare mein aisi baatein bhi farmaai hain ki hum tumhare bhai hain ya tumhari tarah hain ya tum bhi insan ho or hum bhi wagerah to humare liye hargiz munasib nahin ki hum bhi unke baare mein wo alfaz bole jo khud unhone apne baare mein farmaye kyunki bila zarurat apni shaan bayaan karna or apna muqam batana ahle fazl wa kamal ka tarika nahin hai.
Islam mein tauheed ka matlab yeh nahin hai ki sirf Allah Ta’ala ki ibadat karte rahe.Iska zikr karte rahe or isi ka naam lete rahe. Balki islami tauheed yeh hai ki jin ka zikr Allah ta’ala ko pasand hai in ka zikr bhi kare or jin se muhabbat ka usne hukm diya hai un se muhabbat kare or jin logon ko maqam o martabe usne ata farmaye hain unke maqam wa martabe par imaan laye.
Makhlooq mein pahla kafir or gairmuslim iblees shaitan hai or wah Allah ta’ala ko na manne ki wajah se kafir nahin hua balki ek Allah wale yani Hazrat Aadam Alehissalam ki ta’zim na karne ki wajah se khariz az imaan qaraar de diya gaya tha. Usne tauheed de ma’na sirf Allah ta’ala ki zahiri ibadat ko jana or yeh na jana ki ta’zime Aadam ka hukm bhi Allah ne diya hai yani agar wo Hazrat Aadam Alehissalam ki ta’zim kar leta to yaqeenan yeh khudaye ta’ala ke hukm ki baja aawri ho jati or usi ki farmabardaari hoti.
Aane wale safhat mein aap Ahadeese Rasool ﷺki roshni mein Ambiya-e-kiram or Aoliya-e-izaam ki khudadaad shaan wa shoqat mutala’a farmayenge.
Aaj fitnon or firqon ke is daur mein har shakhs ki khwahish yeh rehti hai ki main bajaye kisi or ki baat sunu ke Allah ke Rasool Paigambere Islam ﷺke irshadat wa farmoodat dekhun ki aakhir is baare mein Huzoor ne kya farmaya hai.
Aaj aise logon ki tadaad bhi kafi hai jo Ambiya or Aoliya ki shaan wa martabe ke qayal nahin. Inke mansoobat se tabarruk inke yahan koi cheez nahin. Aise logon ki hidayat or rehnumaai ke liye main ne Ahadees jama ki hain. Mujh ko ummeed hai ki Ahadees padh kar yaqeenan wo raahe raast par aa jayenge or Ambiya or Aoliya-e-izam ki bargaho mein bajaye be adabi ke in ki tariff wa tauseef ke gun gayenge or inse muhabbat wa aqeedat ko imaan ki jaan khayal farmayenge.
Or Allah hi taufeek dene wala hai.
