IKHTIYARATE MUSTAFA
Ikhtiyarate mustafa
Hadees No. 26:
Yazeed Ibne Ubaid farmatey hain ki Maine Hazrat Salma Ibne Akwa’a Radiallaho Ta’ala Anho ki pindalee mein ek zakhm ka nishan dekha to maine kaha aye Abu Salma yeh Nishan kesa hai farmaya mujh ko gazwaaye khaibar mein zakhm aaya tha. Log kehne lage. Salma ka aakhiri waqt aa pahuncha hai. Lekin main Huzoor ﷺki khidmat mein haazir ho gaya or Huzoor ﷺne is par 3 baar dam farmaya to aaj tak isme koi takleef nahin hui.
Hadees No. 27:
Hazrat Ibnul Munqadir riwayat karte hain ki Rasoolallah ﷺke ghulaam Hazrat Safeena Radiallaho Anho Room ki zameen mein lashkar se behak gaye ya qaid kar liye gaye. Woh bhaagtey hue lashkar ki talaash karte they ki achanak ek sher samne aa gaya to unhone farmaya ki aye sher main Rasoolallah ﷺka ghulaam hoon. Mera waqiya aesa-aesa hua hai to sher dum hilata hua inke paas aaya yahaan tak ki inke barabar khada ho gaya. Jab koi aawaz sunta to udhar chala jata phir aapke barabar chalne lagta. Yahaan tak ki woh lashkar tak pahunch gaye or sher laut gaya.
(Mishkaat, Baabul Karamaat, Safa 545)
Is hadees se maloom hua ki aapki hukumat wa badshahat jungal ke khatarnaak janwaro par bhi hai or woh aapki nisbat ka khyaal rakhtey hain or Hazrat Safeena ka sher se ghabra kar Huzoor ka naam wa nisbat ki duhaai dena bata raha hai ki sahaabi ka aqeeda tha ki jungal ke janwar bhi Rasoolallah ﷺko jantey mantey hain or Huzoor ﷺke ghulaamo tak ki khidmat karte hain.
Hadees No. 28:
Imraan Ibne Hussain ek safar ka haal bayaan karte hue farmatey hain mujhko Huzoor ﷺne chand sawaaro ke humraah aage bhej diya kyunki hum sabko sakht pyaas mehsoos ho rahi thi. Hum chale ja rahe they ki humein ek aurat mili jo sawaari par baitthi paani se bhari mashko par pair latkaaye ja rahi thi. Humne isse daryaaft kiya ki paani kahaan hai? Isne jawaab diya ki paani nahin hai. Humne puchha tumhare ghar walo or paani ke darmiyaan kitna faasla hai? Kehne lagi ek raat-din ka safar. Humne kaha tu Rasoolallah ﷺke paas chal. Kehne lagi kaun Rasoolallah? Hum iski baat suni an suni karte hue ise Nabi Kareem ﷺki bargaah mein laaye aapne bhi isse wohi guftagu farmayi jo humne ki thi. Haan itni baat usne or batayi ki woh yateem bachho ki maa hai. Aapne iski dono mashko ko kholney ka huqm diya. Or in mashko ke oopar apna Mubarak hath fer diya. Phir hum 40 pyaase logo ne isse khoob sair ho kar paani piya or jitne paani ke bartan or mashkey humare paas they sab bhar liye. Lekin humne oonto ko paani nahin pilaya or iske bawajood is aurat ki paani ki mashkey ab bhi fatee ja rahi thi phir aapne farmaya jo kuch tumhare paas hai isko le aao. Chunanche roti ke tukde or khajoorein jamaa kar di gayi taki woh apne ghar waalo ke liye le jaaye. (Gaanv mein ja kar) Is aurat ne kaha ki maine aaj ek bahut badey jaadugar ko dekha hai ya phir woh Nabi hai jaisa ki iske sathi khyaal karte hain. Phir is gaanv waalo ko Allah Ta’ala ne is aurat ki badaulat hidayat di ki yeh khud bhi Musalmaan ho gayi or dusre logo ne bhi islaam qubool kiya.
(Bukhari, Zild 1, Safa 504)
Hadees No. 29:
Hazrat Anas se riwayat hai ki Hazrat Abu Talha ne (Hazrat Anas ki waaldeh or apni biwi) Umme Sulaim se farmaya ki maine Rasoolallah ﷺki aawaz mein kamzori mehsoos ki hai. Aapne khana tanaawul nahin farmaya hai to kya tumhare paas khane ki koi cheez hai? Unhone kaha Haan or chand Jau ki rotiya nikal laayi. Phir ek dupatta nikala or iske pallu mein rotiya lapait di. Phir rotiya mujhko dekar iska ek pallu mujhko udha diya or mujhko Huzoor ﷺki khidmat mein bhej diya. Jab main Huzoor ﷺki khidmat mein haazir hua to dekha ki Huzoor ﷺkuch logo ke darmiyaan tashreef farma hain. Main inke paas ja kar khada ho gaya to mujhse Huzoor ﷺne puchha kya tumko Abu Talha ne bheja hai? Maine arz kiya Haan. Farmaya kya khana lekar bheja hai? Maine arz kiya Haan. Phir Huzoor ﷺne apne sathiyo se farmaya sab chalo or sab chal padey. Main bhi inke aage-aage chal kar Hazrat Abu Talha ke paas aaya to maine inko bataya ki Huzoor ﷺsab logo ko lekar aa rahe hain. To unhone apni biwi Umme Sulaim se kaha ki Huzoor sab logo ko lekar aa rahe hain or humarey paas inke khilaane ko nahin hai. To Hazrat Umme Sulaim ne kaha ki Allah wa Rasool behtar jantey hain. Phir Abu Talha Rasoolallah ﷺke istiqbaal ke liye nikal padey. Yahaan tak ki Huzoor ke sath ho liye. Huzoor ﷺne Abu Talha ko sath liya or inke ghar tashreef laaye. Phir Huzoor ﷺne Umme Sulaim se farmaya ki jo kuch tumharey paas hai le aao. Unhone wohi rotiya haazirey khidmat kar di phir Rasoolallah ﷺne inke tukde-tukde karne ka huqm diya. Or Umme Sulaim ne saalan ki jagah kuppi se sara ghee nikal liya. Phir Huzoor ﷺne is khaney par kuch padha jo khuda ne chaha. Phir farmaya 10 aadmiyo ko khaney ke liye bulaao. Jab unhone khoob sair hokar kha liya or wo chale gaye to Huzoor ﷺne farmaya 10 aadmiyo ko khaney ke liye or bulaa lo. Chunanche woh bhi sair ho kar chale gaye to farmaya 10 ko or bulaa lo. Hazrat Anas kehte hain ki isi tarah poori qaum ne khana tanaawul farma liya or woh log 70 ya 80 aadmi they.
(Bukhari, Zild 1, Safa 505)
In hadeeso ko padhne par bakhoobi waazeh ho jata hai ki aurat ki do mashko par hath pher kar inke paani se saari qaum ko sairaab kar dena yahaan tak ki unhone apne mashkizey or bartan bhi bhar liye or chand rotiyo se 80 aadmiyo ko shikam sair farma dena mehboobe khuda ki shaan hai or kitne ikhtiyaraat Khudaye Ta’ala ne aapko ata farmaye hain. Yaqeenan aap ba-ataye ilahi mukhtaare Qul hain jo chahein woh karein.
Hadees No. 30:
Hazrat Jabir se marwi hai ki ek shakhs Huzoor ﷺki khidmat mein khana mangne aaya to Huzoor ﷺne isko aadha wask Jau inaayat farmaye. Woh shakhs iski biwi or iske mehmaan isme se khate rahe yahaan tak ki ek din usne naap liya to woh khatam ho gaya to wo Huzoor ﷺki khidmat mein aaya. Huzoor ﷺne farmaya agar tum naaptey nahin to khatey rehte or woh baaki rehta.
(Muslim, Zild, Safa 246, Mishkaat Safa 544)
Hadees No. 31:
Hazrat Abdul Rehmaan Ibne Abi Bakr farmatey hain ki hum ek martaba Huzoor ﷺke sath 130 log safar mein they. Huzoor ﷺne farmaya kya tum mein se kisi ke paas khana hai? Is waqt ek aadmi ke paas ek sa’a khana(aata) tha. Ise goondh liya gaya. Itne mein ek lamba tadangaa mushrik bakriyo ko haankta hua aaya. Huzoor ﷺne farmaya bechogey ya yunhi de doge? Isne kaha bechunga. Phir aapne isse ek bakri khareed li or iski kaleji bhunne ka huqm diya. Khuda ki kasam 130 logo mein se har-ek ko is kaleji se hissa mila. Jo haazir they inhe de diya gaya jo gaayab they inka hissa rakh diya gaya. Phir bakri ka gosht do kundo mein nikala gaya. Phir hum sab ne khoob pet bhar kar kha liya. Or do kundo mein bach bhi gaya jo humne oont par laad diya.
(Bukhari Zild 2, Safa 811, or Zild 1, Safa 356, wa Safa 295)
Hadees No. 32:
Hazrat Anas Ibne Maalik se marwi hai ki ek din Madeeney mein kuch khatra mehsoos hua to Huzoor ﷺHazrat Talha Radiallaho Anho ke ghodey par sawaar ho kar nikle. Yeh ghoda bahut sust raftaar tha. Jab aap wapas tashreef laaye to farmaya humne tumharey ghodey ko darya ki tarah tez raftaar paya. Raawi kehte hain ki phir woh ghoda is kadar tez raftaar ho gaya ki koi ghoda isse aagey nahin ja sakta tha.
(Bukhari, Zild 1, Safa 401)
Yaani Huzoor ﷺne is ghodey ko jo sust raftaar tha us par sawaar hokar tez raftaar or muqaable mein sabse aagey janey wala bana diya. Or yeh sab Allah ta’ala ki taraf se hai. Ki usne Rasool ﷺko yeh ikhtiyaar ata farmaya hai.
Hadees No. 33:
Makke waalon ne Rasoolallah ﷺse kaha ki aap koi mu’ajiza dikhaye to Huzoor ﷺne inhe chaand ke do tukdey karke dikhaye yahaan tak ki unhone hira pahaad ko chaand ke do tukdo ke darmiyaan dekha.
(Bukhari, Zild 1, Safa 546)
Is hadees se maloom hua ki Allah Azzawajal ne apne mehboob ko aasmani duniya par tasarruf farmaney ka ikhtiyaar diya hai. Chaand ke tukde karne se zaahir hai ki aapke ikhtiyaraat or khuda-daad qudrat tasarrufat ka andaza lagana mushkil hai or waakyee aap Mukhtaarey Qul-e-kayenaat hain.
Hadees No. 34:
Hazrat Abu Rafey se riwayat hai ki mere paas ek bakri hadiya bheji gayi. Maine isko haandi mein dala phir Rasoolallah ﷺtashreef le aaye. Farmaya Abu Rafey yeh kya hai? Arz kiya Huzoor bakri hai jo humko hadiya di gayi hai. Phir humne isko haandi mein pakaya hai. Huzoor ﷺne farmaya Aye! Abu Rafey humein ek dast do. Maine ek dast pesh kar diya. Phir farmaya Aye! Abu Rafey or dast laao. Maine pesh kar diya. Wo tanawul farmaney ke baad farmaya ek dast or laao. Maine arz kiya Huzoor bakri ke do hi dast hote hain to Rasoolallah ﷺne irshaad farmaya agar tum khamosh rehte to tum mujhko dast pe dast pesh karte. Jab tak tum khamosh rehte (Haandi mein dast peda hote rehte).
(Mishkaat, Safa 41)
Is hadees ko padh kar yeh kehna hi hoga ki zabaaney Mustafa ﷺ‘Kun Fayakoon’ ka mazhar hai. Yaani aapke ikhtiyaraat ka yeh aalam hai ki jo farma de woh ho jaaye ki khwaah aadatan na-mumkin or muhaal hi kyu na ho.
Hadees No. 35:
Hazrat Abu Hurerah Radiallaho Anho se marwi hai ki Rasoolallah ﷺne irshaad farmaya: Yakeen jaan lo ki saari zameen ke malik Allah ta’ala wa Rasool hain, Jalla Jalaluhoo wa ﷺ.
(Bukhari, Zild 1, Safa 449)
Sahi Bukhari ki is hadees se khoob maloom ho gaya ki Allah Ta’ala jo maalikey haqeeqi hai usne saari zameen ka badshaah apne mehboob Hazrat Muhammed Mustafa ﷺko banaya hai. Isse Khudaaye Ta’ala ki badshaahat or milkiyat par koi farq nahin padta kyunki dusro ki milkiyat atayee wa majazee hai or iski zaati or haqeeqi. Or dusro ko ata farmaney ke baad bhi haqeeqi malik khuda hi hai. Balki jo kuch deta hai iska malik bhi wohi hai or jis ko deta hai iska malik bhi wohi hai.
Hadees No. 36:
Hazrat Sayyadna Umar Farooq Radiallaho Anho se marwi hai ki Rasoolallah ﷺne irshaad farmaya jiska muhaafiz wa nigehbaan na ho Allah or Rasool uske muhaafiz wa nigehbaan hain.
(Tirmizee Zild 2 Safa 31, Ibne Maja Zild 2 Safa 201)
Hadees No. 37:
Hazrat Abu Hurerah Radiallaho Ta’ala anho se marwi hai ki Rasoolallah ﷺne sadqey ka huqm diya to aapse kaha gaya ki Ibne Jameel or Khaalid Ibne Waleed or Abbas Ibne Abdul Muttalib zakaat nahin dete. Huzoor ﷺne farmaya. Ibne Jameel na-shukra ho gaya kyunki woh muhtaaj wa faqeer tha to Allah Ta’ala or iske Rasool ne isko maaldaar kar diya. Khaalid se zakaat maangna zyadatee hai. Isne apni jar-hein or hathiyaar raahey Khuda mein wakf kar diye or Abbas Ibne Abdul Muttalib to woh Rasoolallah ke chacha hain inka sadqa inhi par hai or itna or bhi.
(Bukhari, Zild 1, Safa 198)
Hadees No. 38:
Hazrat Anas Radiallaho Ta’ala anho se marwi hai ki ek shakhs Huzoor ﷺki khidmat mein us waqt haazir hua jabki aap Madeeney mein namaazey jum’a ke liye khutba de rahe they usne arz kiya Ya Rasoolallah ﷺbaarish na hone ki wajah se sukha pad gaya hai lihaza aap apne Rab se baarish maangiye. To Huzoor ﷺne aasmaan ki taraf dekha or aasmaan par baadal ka naam-o-nishaan tak na tha lekin aapne dua maangi to baadal ke tukde ek dusre se aakar milne lagey or phir baarish hone lagi yahaan tak ki Madeeney ki galiyaan paani se bhar gayi or baarish lagataar agle jum’aey tak hoti rahi. Phir wohi aadmi ya koi or us waqt khada hua jab Huzoor ﷺkhutba de rahe they or arz karne laga Ya Rasoolallah ﷺhum to doobney lagey lihaza apne Rab se dua kijiye ki is barish ko rok le. Huzoor ﷺmuskuraaye or farmaya Aye! Allah humarey ird-gird barsaa hum par na barsaa, yeh 2-3 baar kaha ki baadal chhantaney lagey or Madeeney ke idhar-udhar jaane lagey or humarey aas-paas baarish hone lagi or humarey oopar se hat gayi. Hazrat Anas kehte hain ki yunhi Allah ta’ala apne nabi ki shaan or aapki barkat wa rehmat or aapki dua ki qubuliyat logo ko dikhata hai.
(Bukhari, Zild 2, Kitaabul Aadab, Safa 900)
Is hadees se yeh achhi tarah samajh mein aa jata hai ki saari kayenaat ka Khaalik wa Maalik Huzoor ﷺki marzi ko nahin taal-ta or aapke munh se nikli har baat fauran poori farmata hai or jiski marzi khuda na taale isko majboor nahin kaha ja sakta Mukhtaarey Qul kayenaat hi kaha jayega.
Is hadees se yeh maloom hua ki museebat wa pareshani mein khudaaye ta’ala ke mehboob bando ki bargaaho mein haazir hona or bargaahey Khuda-wandi mein inko waseela banana jayez hai. Warna dua khud bhi maangi ja sakti hai inse dua karaaney ka matlab waseela nahin to or kya hai?
