Murdon Ko Sawaab Pahunchana Or Khana Samne Rakh Kar Fatiha Padhna
Jo log duniya se guzar chuke hain unke naam par sadqa wa khairaat karke uska sawaab unhe pahunchana bila shubha jaayez hai or Ahadees se saabit hai jo khaane peeney ki cheez khairaat ki jaaye usko samne rakh kar bhi kaha ja sakta hai ki iska sawaab falaa’n ko pahunchey or samne na rakha jaaye yunhi uski rooh ko sawaab pahunchaney ki niyat se sadqa kar diya jaaye dono’n tarah jaayez hai.
Hadees No. 1:
Hazrat Aayesha se marwi hai ki ek sahabi Rasoolallah ﷺ ki khidmat mein haazir hue or arz kiya Ya Rasoolallah ﷺ meri Maa’n ka achaanak intikaal ho gaya or woh koi wasiyat na kar saki. Main samajhta hoon agar usko bolne ka mauka milta to zaroor sadqa karti. To agar main uski taraf se sadqa karoon to usko sawaab milega? Farmaya Haan milega.
(Sahi Muslim Zild 1 Safa 324)
Hadees No. 2:
Hazrat S’ad Ibne Ubada se marwi hai ki unhoney arz kiya Ya Rasoolallah ﷺ S’ad ki Maa’n ka intikaal ho gaya to kaun sa sadqa behtar hai? Huzoor ﷺ ne irshaad farmaya paani afzal hai to unhoney ek kunwaa khudwaya or farmaya yeh kunwaa meri Maa’n ke liye hai. Yeh Hadees Abu Da’ood wa Nisaee mein hai.
(Mishkaat Safa 199)
Chunki Hazrat S’ad ne kunwe ke samne khadey hokar farmaya ki yeh meri Maa’n ke liye hai lihaaza khaaney peeney ki jo cheez sadqa ki jaaye usko samne rakh kar yeh kehna ki iska sawaab falaa’n ko pahunchey yeh hargiz khilaafe shar’a nahin balki Sahabiye Rasool ka tareeqa hai.
Note: Afzal woh sadqa hai jis ki zaroorat jyada ho. Chunki Arab mein paani ki kami ke peshe nazar iski zaroorat sakht rehti thi lihaaza Huzoor ﷺ ne paani ko afzal sadqa qaraar diya.
Hadees No. 3:
Hazrat Anas se marwi hai phir Rasoolallah ﷺ ne in rotiyo’n or ghee par kuch padha jo Allah ne chaha ki aap padhein.
(Bukhari Zild 1 Safa 505)
